Act 18 | ASO | STEP | Ne'mine ogavo Paulo' aza Atena ebe' hulo Kolidi ebeku' vine'.

Acts 18

Paulo' Kolidi Ebeta Vo Gono Dani' Gamazi

1 Ne'mine ogavo Paulo' aza Atena ebe' hulo Kolidi ebeku' vine'. 2 Nela Zuda ve ma do soto' molo ningine' nene gulive Akuila'. Eze nene Podo misubouko gidave minine'. Podo misubo hulo vo elenaho Pilisikilakisi Italia misubouko nizasivo Guvelesi ve naba Kalaudio' aza Zuda ve Loma ebeku' minamilizave lo lo huko-ngedo ngimiselo do hulavo ingine a'mine ebe' huli Kolidi ebeku' vi minasine'. Olihe mini guni amasivo Paulo' aza engita vo heteline'. 3 Azasi inginesi hamo' gono di seli numuno gizaa' ave minani' nenako engi' numungu' dizo mino gono makato' di minani'. 4 Ne'mine navo Paulo' aza holiseku' holiseku' Zuda veti mono' numungu' dizo Zuda vesi ido' nGiliki vesi do upuho' o-ngedekuvo gili ele'vole' ilizahe lo O'moso'mo do lu' izelive lo imiselelesa live nene Izesu' ma ve loo lo ngolo' lo lo-ngemeka' ngemeka' ogo minine'.

5 Ne'mine ogavo Silasiki Timoteoki ingine Makedonia misubouti' asine' gameneu' nene Paulo' mono' gono gamene gamene amuzo molo do mino O'moso'mo do lu' izelive lo imiselelesa live ma nene Izesu' ve lo eze monovo've lo soto' ogo Zuda ve lo-ngemo minine'. 6 Minavo eze gamazi lido' e'menga li-imi eze divi' ledivika li minikevo hungo' molo genegana'veloti' u'musupo tile' ogo do hulo ti' lo lo-ngimine': Lingine labuluvo ilizani' nene lihime nenita minamoloseive. Lengitavo' mineleseive. Nemu' mehe'ne lengemo heta ato' vetida volosuve. 7 Ne'mine lo a'midoti' lemo vo ve mali'mi numungu' dizo minine'. A'mine ve ne gulive Titio' Zusito'. Aza nene haza heta ve mino O'moso opo'ni lo gelekele' o-do minaa' ine'. Ido' eze numu've nene Zuda veti mono' numuno gahevela minine'. 8 Paulo' aza a'mine numungu' dizo minavo mono' numuno gizebo ve Kilisipokisi eze vene' izipahala zuhosi Guvelesi vemu' gili ele'vole' ikevo Kolidi aleve minanguti' evene' mukikisi monokumu' gili ele'vole' igi mono' noso hilani'. 9 Ido' gamene ma holuka' Guvelesi ve'mo Paulo'ni vamuto' soto' o emo ti' lo lo-imine': Geze gehelele izamivo mono' lo-ngemaa' naine' nene hulamo vetete' ogo lo-ngemovo' mineline. 10 Mene ebeku' aleve vai' nene neze zuho lili' ilizave nizani' nenako naza gezesi mino gizebo o-gedo nouvo ve mali'mosi do goloso o-gedamoloseive. 11 Ne'mine lo-emavo nemu' Paulo' aza mino O'moso'mi gamazi lo-ngeme' ngeme' ogo kilisimasi hamokisi ike'ni sikisi nesi' huline'.

12 Hulavo Galio' aza Akaia misubou' guvelesi ve naba lolo' ogo neivo Zuda ve ingine di bizi Paulo'ni lovo i imi analo' di goni' numungu' ele'mizi mili 13 ti' li lani': Ve me'mo nene lou' gamazi avuto' olone' akalo' lele'mize molo di atoli'mine igi O'moso opo'ni li gelekele' i-dilizave lo evene' gate daa' neive. 14 Ne'mine likevo Paulo' aza gamazi lado' do velepe' izo lo-emelesa giline'za Galio' aza Zuda ve ti' lo lo-ngimine': Agae, Zuda vekizo, ve mene'mo lihime naba nehe goloso nite' geni'vesi nehe ne'mine dani' ningisa lingine nemu' ladiniko gelelodo' lisihe' ogavo nemu' gamazitine nene ha gele-lingiduvodine. 15 Ne neine'za haza gamazimukisi ido' evene' gulivetinemukisi ido' lengi' lou' gamazitinemukisi gamazi gono nidanako nene lengi' initetine ve. Ne'mine initekumu' goni' gelelesa gosele' gohi nebelave. 16 Ne'mine lo goni' numunguti' ngeleto huline'. 17 Ne'mine ogavo evene' muki' mono' numudo' gizebo ve ma gulive Sositene'ni nene ele'mizi di vi goni' numuno velela bilivi' bilivi' igi minani'za Galio' aza ningo ninge huline' ve.

Paulo' Adiokia Ebeta tine' Molo Vine' Gamazi

18 Ne'mine ogavo Paulo' aza Kolidi ebeku' gamene ha'natile ma nomino Izesu' zuho mese' aseka' lo-ngedo Pilisikilaki ido' Akuilaki ngele'mizo Kenekelea ebeto' vo heteline'. Gozopo' O'moso'mi gulivelo' lo huko godolo zopovo hukamo haza hulokine'. Kenekelea ebeto' hetelo lo hukine' gamene alitavo a'mido' godolo zopovo hukine'. Hukavo Silia misubou' vilisa sipiu' dizi guvo noso huki'mi vani'. 19 Vi Eheso ebeta heteli Pilisikilaki Akuilaki a'mido' minikesivo Paulo' aza Zuda veti mono' numungu' dizo inginesi mono' li volelo' melo' igi minani'. 20 Ne'mine igi inginesi gamene gohi ma minelone lani'za gele ngemamo 21 mese' aseka' nolo-ngedo ti' lo lo-ngimine': O'moso'mo gele nemavo gohi lengita tine' molo alosuve. Ne'mine lo sipiu' dizo Eheso ebe' nene hulo vine'. 22 Vo Kaesalea ebeta hetelo sipiuti' lemo Zelusalemi ebeku' dizo vo Izesu' evenele zuho ninge-ngedo ngopo'ni lo Adiokia ebeta o lomo vine'. 23 Adiokia ebeku' ngomo mino gohi vo Galatia misubouko ido' Piligia misubouko numudo' namado' Izesu' evenele zuho luhive'ine do ngi lo-ngidine' ve.

Apolo' Aza Eheso Ebeta Mono' Lo-ngimine' Gamazi

24 Ido' Zuda ve ma minine' gulive Apolo' aza Alekisadilia ebeku' gidaveli'mo Eheso ebeta ogo heteline'. Aza nene gamazi gehe izo noso'vesivo' laa' ive mino mono' godolouti' gamazi nene gele osu' line'. 25 Guvelesi ve'mi akamu' vetete' igi li-imikevo giline'. Ido' aza Izesu'nimu' gamazi nene do veveso laminosa ngilingili ogo amuzo molo vetete' ogo lo-ngeme' ngeme' ogo minine'za Izesu' zuho mono' noso hili-ngidaa' ani' monovo nene gelamo Zohane' mono' noso holo-ngedaa' ine' monovovo' nene gelo nemukovo' lo-ngemaa' ine'. 26 Zuda veti mono' numungu' dizo api' ogo gamazi lovo' kiselevo' ogo lo-ngimine'. Nolo-ngimivo Pilisikilaki Akuilaki ingine gilii alinge' di gahevela i-di O'moso'mi akamu' gamazi lingela li ngolo' li li-imi osu' li elebize lamine' asine'. 27 Ne'mine ikesivo Apolo' aza Izesu' evenele zuho Akaia misubouko minani' ingine novivo ma di lamine' i-dilizave li luhuvo nite' gizi imikevo do vine'. Do vo hetelo O'moso'mo nasahili' o-ngidivo ezemu' gili ele'vole' ave ngele'mize lamine' ine'. 28 Mono' godolouti' gato lo ngolo' lo O'moso'mo do lu' izelive lo imiselelesa live ma Izesu' ve lo ne'mi monovo evene' mukiliti ve'nido' lo soto' molo lo-ngemo Zuda vete li volelo' melo' igi ataize lani' nene ngivile' ogo do leme-ngidine' ve.